جديد الموقع::          التغطية الإعلامية لشهر محرم 1434هـ              جديد الموقع::          تغطية يوم عيد الأضحى 2012م              جديد الموقع::          صور أعياد ميلاد حبايبي               جديد الموقع::          كل ما يتعلق بالشهيد حسام الحداد 18/8/2012م              جديد الموقع::          تغطية لتقسيمة شباب الحياك الأسبوعية لكرة القدم               جديد الموقع::          التغطية الإعلامية لدورة المرحوم محمود الخور الخامسة لكرة الطائرة 2012م              جديد الموقع::          طموح صيف الحياك 2012م              جديد الموقع::          مواليد الخير إن شاء الله              جديد الموقع::          زواج وعقد قران 2012م              جديد الموقع::          التغطية الإعلامية لأفراح ( مواليد ) أهل البيت (ع) 1433هـ - 2012م               
أنت زائر المدونة رقم: 2115367
(4) .. من ذكريات أبو عمار الحايكي .. الخروف بو 12 سلندر !!
 تاريخ: 2009-10-09 - قراءات: 794






أقول ويش رايكم ألحين نقول لكم سالفة
الخروف بو 12 سلندر


يلله توكلنا على الله

.:. الخروف بو 12 سلندر .:.

على فكرة هالسالفة يعرفونها وايد من فريج الحياك
لأنها صارت في وسط الفريج
وتصدقون إن أول مرة ناس تضحك هلون ليلة عاشر
وزين ما انخفسنه ذيج الليلة
بس والله معذورين
واللي شاف اللي شفناه ما أعتقد يقدر ايود روحه من الضحك

المهم ، خلونه نبدي السالفة

من جم سنة وفي شهر محرم وبالتحديد ليلة عاشر محرم
وبعد ما خلصنه من العزاء في وقت متأخر من ذيج الليلة
( على فكرة عزانه يخلص في الساعة 3 الصبح تقريبا )
والشباب منسدحين في الفريج من التعب
وآنه ومعاي بعض الشباب قاعدين انظف العرشة ( مضيف الإمام الحسين )
وكنه دايخين حدنه وهبابه بس نقدر انخم العرشة ونغسل الغواري والاستيكانات
وخاصة إن ما في مجال بعد إنأجل التنظيف ليوم ثاني
لأن العزاء بيتحرك صباح اليوم الثاني يوم عاشر محرم
ولازم يكون كل شيء نظيف من الصبح قبل الساعة 7 الصبح


المهم وإحنه قاعدين انخم وننظف
وكنه تونه بننتهي من التنظيف والتغسيل
وإلا بواحد من الربع ياي لي وقال : بوعمار طلبتك ؟
قلت له : أفا عليك آمر يا .......
قال لي : تدري إن في خواريف جمع خروف حق باجر يوم عاشر نذبحهم
قلت له : إي أدري
قال لي : في خروف مربوط من رجوله ونبي نوديه نشيله من بيت العود ( مأتم النسوان )
ونوديه لمكان ثاني مخصص له لباجر الذباح

قلت له : يا ولد الناس والله إحنه دايخين حدنه
خله مكانه أحسن له ولنه


قال لي : والله حرام يا بوعمار
أكو اليهال قاعدين يغربلونه
وكفاية باجر بيسدحونه وبيذبحونه
يعني لازم يعذبونه قبل
خلنه نشيله ونوديه وكلها دقيقتين
والشباب موجودين ما شاء الله ، ويش رايك ؟

المهم تم يطحن علي لين قلت له
إنزين يالله خلنه نشيله وبسرعة
لأني الصراحة دايخ حدي والشباب بعد دايخين

المهم ، رحنه للخروف أنا وبعض الشباب
وإلا الخروف جنه بيموت
ما يتحرك ، نشيله ونوقفه ونهده يطيح
يعني ما فيه شدة حتى يوقف

قلت له أكو خروفكم من ألحين ميت
ما يحتاي تذبحونه ولا شيء

المهم ، قررنه إن إحنه نشيله بالقوة
وتيمعنه الشباب وتمينه نحركه يمين يسار
ماكو فايدة ، كان ثقيل حده حده حده
وريحته ما شاء الله عليه
خوب ما يحتاي خروف يعني متعطر بعطر
أكيد ريحته ريحة

وخاصة إذا يدري إنه جريب بيقصبونه
يعني ريحته ريحة من الخوووووف

المهم ، تيمعنه كلنه الشباب نبي نحركه ماكو فايدة

تره على فكرة هالكلام كله نصايف الليل
وتقريبا جريب أذان الصبح


المهم ، وإحنه يالسين نفكر إشلون نشيل هالخروف
قمنه بطلنه الحبال المربوط بهم
قلنه يمكن يحس إنه طليق وحر ويتحرك إشوي

وحتى يوم صار حر بعد ما فيه شدة حتى يوقف

المهم ، وإحنه قاعدين نفكر ونفكر ونفكر

مر علينه واحد معروف عنه بحركاته الشيطانية هههههه
المهم قال ويش فيه هالخروف مو راضي يتحرك
قلنه له ويش درانه ويش فيه
قال لنه : وإذا خليته يمشي ويتحرك
قلت له : يالله راونه شطارتك

المهم ، كلها لحظات بس
والله لحظات
وأعتقد إن اللي كان حاضر في هالسالفة يعرف هالشيء

المهم ، لحظات بس
وصار اللي محد يصدقه

إشوي وإلا هالخروف اللي مو راضي حتى ييلس عدل
صار كأنه إبليس رجيم
وتم يناطح ويراكض
وإحنه ويش كثرنه وراه نبي نيوده
مافي فايدة

خروف مهتد مين يقدر عليه

والله للحين أتذكر قوته هههههههه

توه من إشوي بيموت وشلي خلاه يصير جذي
وكأنه مركبين عليه 12 سلندر ، ما يندره ليش ؟


المهم تم يتعتع بالأولي والتالي
حتى واحد من الشباب يوده من الفرو اللي على ظهره
ومن قوة الخروف اسحبه وياه هههههههه
وتم يراضخ به عدل في الطوفة وفوق العتب

الصراحة خفنه منه

حتى آنه أقول للشخص اللي تحدانه بأن يخليه يوقف
ويش سويت فيه ؟
قال : ما سويت شيء
قلت له : ليكون خبرته إنه بيذبحونه باجر
وعشان جذي من حلاة الروح ياته القوة الشيطانية هههههههه


المهم ، وبعد جهد جهيد وتعب وركيض وصريخ نصايف الليل
واليهال ويش كثرهم مستانسين
( إي خوب صار لهم برنامج ولا على الحسبان )

المهم ، قدرنه انيوده إحنه جم واحد من الفرو مال ظهره
وبعد كان فيه قوة وتم يعافر يمين ويسار
بس إحنه يودناه عدل وطلعنه به ونبي انوديه المكان المخصص له

وكان في الفريج رياييل يالسين مني ومناك
لأن مثل ما قلت لكم توه مكمل العزاء وينتظرون أذان الصبح عشان يصلون وينامون

المهم ، وإحنه طالعين فيه والخروف يتعفرت
وما شاء الله عليه فيه قوة ما أدري وين كان خاشها

المهم ، إشوي وإلا هو مهتد بقوة
الصراحة ما قدرنا انيوده عدل
وفلت من يدنه ويركض بسرعة
أي سيارة سباق أي شوماخر أي حصان سباقات

.:. والله لو مشاركين به في مصارعة ثيران فزنه بالراحة .:.

المهم تم يركض هالخروف في الفريج بسرعة
وإشوي كان يالس يوم الطوفة اثنين من الرياييل
ومن التعب كانوا مبسطين في الأرض
والخروف متوجه لهم وهم ما يدرون يسولفون
وإحنه نصرخ عليهم حاسبوا خروف يايكم ههههههههه

إشوي من الصريخ التفتوا وما يشوفون إلا خروف ياي بسرعة صوبهم

وإشوي وإلا هاذوله الرياييل اللي ما فيهم شدة حتى يتحركون من مكانهم
ومن حلاة الروح وقفوا على طولهم ومر يمهم الخروف طهف يمهم
يعني لو ما قاموا جان داس في جبدهم ههههههههه

ومحد قدر ايود هالخروف المينون

بس تدرون إشلون قدرنه عليه
ولأنه خروف دعم في مربعة الكهرباء وانسدح ههههههههه
قمنه تيمعنه عليه وشلناه بسرعة وسيده قفلنا عليه مكانه
وإحنه مو مصدقين روحنه إن السالفة انتهت على خير

وبعد ما صار كل شيء
ياني الشخص اللي طلب مني هذا الطلب وقال لي رحم الله والديك يا بوعمار
ما قصرررررت هههههههههه


التفت له وقلت له والله لو إنت مو عزيز جان راويتك
يعني يبت لنه سالفة ولا على الحسبان
ودوختنه زود حسبي الله على إبليسك

المهم ، تصدقون إن ثاني يوم صارت سالفة في الفريج
الناس تاكل غداء يوم عاشر
وإحنه ندور لحم الخروف اللي بهدلنه ههههههههههه



وإلى لقاء قريب مع إحدى ذكريات أبو عمار


مع تحيات
بوعمار الحايكي