جديد الموقع::          التغطية الإعلامية لشهر محرم 1434هـ              جديد الموقع::          تغطية يوم عيد الأضحى 2012م              جديد الموقع::          صور أعياد ميلاد حبايبي               جديد الموقع::          كل ما يتعلق بالشهيد حسام الحداد 18/8/2012م              جديد الموقع::          تغطية لتقسيمة شباب الحياك الأسبوعية لكرة القدم               جديد الموقع::          التغطية الإعلامية لدورة المرحوم محمود الخور الخامسة لكرة الطائرة 2012م              جديد الموقع::          طموح صيف الحياك 2012م              جديد الموقع::          مواليد الخير إن شاء الله              جديد الموقع::          زواج وعقد قران 2012م              جديد الموقع::          التغطية الإعلامية لأفراح ( مواليد ) أهل البيت (ع) 1433هـ - 2012م               
أنت زائر المدونة رقم: 2115359
(2) .. من ذكريات أبوعمار .. يا ويله اللي يقص على فريق الأحلام !!
 تاريخ: 2009-08-14 - قراءات: 695

 

 

 .:. يا ويله اللي يقص على فريق الأحلام .:.


ها ، إشلونكم من بعد قصة السيكل العجيبة ؟
أكيد عجبتكم هههههههههه

المهم ، اليوم يايب لكم قصة صارت من زمان بعد
يوم كنه صغار يلست أنا والربع وقررنا نسوي لنه فريق لا يقهر هههههه
وصج كلها جم يوم وإلا الفريق جاهز
واخترنه له اسم فريق ) النسور (
وسبب اختيارنه للإسم ببساطة عشان نخوف الفرق ههههههههه

المهم ، قمنه يمعنه البيزات وشرينه الفانيلات الكشخة
وطبعا رقم (14) محجوز اللاعب الخطير واللي هو آنه هههههه

واللي ذبحني من الضحك إن اثنين من الربع تهاوشوا على الرقم  )10)
واللي قاهرني إن اثنيناهم ما يعرفون يلعبون وأصلا هم احتياط ههههه
 )
بووووه هالموضوع فيه فضايح وايد (
يالله ما علي من أحد
أنا بايع ومخلص في هالموضوع
والعجيب بعد إن واحد من هالإثنين يلعب حارس مرمى 
 
بذمتكم شفتوا حارس مرمى لابس رقم 10

هذا بس في فريقنه يصير هههههههههه

المهم ، بعد ما جهزنه الفريق
تمينه ندور ملعب نلعب فيه
الصراحة ما حصلنه ولا نتفة أرض
وفي النهاية اقترح علينه واحد من الربع إن إحنه نروح نلعب مباريات مع فرق ثانية
عشان نستغل إن عندهم ملعب
استانسنه وايد لهذي الفكرة العجيبة
ورحنه دورنه لنه فريق بشرط يكون عندهم ملعب

وصج حصلنه على فريق
صج هم أكبر منا بوايد في السن والأجسام
بس قلنه العوض ولا الحريمة

المهم ، رحنه لهم وقلنه لهم : نبي نلعب ضدكم
طالعونه من تحت لتحت
وقالوا : إنتوا تلعبون ويانه ؟!!
قلنه : إي ، ويش فيها
قالوا لنه وهمه يتطنزون علينه : نخاف تغلبونه !!!
قلنه لهم : ويش عاد إحنه قابلين
قالوا لنه : بنلعب وياكم بشرط
فريقكم يدفعون 20 روبية وإحنه علينه الكأس
واللي يفوز ياخذ البيزات والكأس

قلنه أوكي

وخذينه موعد للمباراة
ورحنه وإحنه متشققين من الفرحة
وأخيرا حصلنه فريق نلعب ضده
لا ، وعلى كأس بعد
صج فن

المهم ، تمينه نتدرب في الكازينو ) حديقة المحرق  (
وأشكالنه تضحك والله
ما في اثنين متناسقين
الضعيف ضعيف والطويل طويل والمتين متين
والحالة حالة
بس تبون الصج كان فريقنه على قلب واحد
وهاذي اللي كان يخلينه مستانسين وايد

المهم وصلنه ليوم المباراة
ورحنه وشفنه الفريق الثاني كل واحد ويش كبره
قلنه ما علينه منهم
وقبل لا اندش الملعب نلعب المباراة قالوا يبون الـ 20 روبية
عطيناهم الـ 20 روبية في خريطة
صايرين ويش كثرهم
لأنهم خردة بو نص 50 فلس وبو أربعانات 25 فلس وعشور  10 فلس 
وتم واحد يعد فيهم فلس فلس
ويوم تأكد إنهم 20 روبية بالتمام والكمال
عطانه الضوء الأخضر عشان اندش الملعب

ودشينه الملعب ولعبنه ضدهم
طقونه طق سنة في يوم
بس إحنه ما علينه منهم تمينه نلعب ونلعب
وفزنا عليهم
وإحنه مستانسين حدنه

وقلنه لهم نبي الكأس والبيزات
ضحكوا علينه ومشوا

ها ، جنه قصوا علينه ؟!!
إي والله قصوا علينه

وراحوا وخلونه بروحنه في الملعب
وخذوا الكأس والبيزات ومشوا
وإحنه لا حول لنه ولا قوة
وكل واحد يشوف الثاني ومو قادرين نسوي شيء

الصراحة صادتنه حرة في قلبنه
وقلنه والله ما نفوتها عليهم

المهم رحنه نفتر ونفتر وندور غراش قزاز ( بيبسي وميرندا وسفن أب (
ويمعناهم في خيشتين

ورحنه ملعبهم وكسرنه الغراش في كل نتفة في الملعب

وبعد ما بردت حرتنه

قمنه وكسرنه العوارض

وبعد ما بردت حرتنه

قمنه يمعنه خمام من لدرامات اللي يم الملعب
وانجل لا تنجل في الملعب

وإحنه نشتغل شغل شدان
إشوي وإلا واحد يصرخ علينه
التفتنه صوب الصوت وإلا واحد من اللي لعبنه ضدهم ياي الملعب وشافنه

وتم يسب ويلعن فينه وراح يركض ينادي ربعه

وإحنه عينك ما تشوف إلا النور
إركض لا تركض
وكلها دقايق وإلا إحنه في وسط الفريج

صج احترينه بسبة البيزات والكأس
بس مستانسين باللي سوينا فيهم

يستاهلون ليش يسووون جذي فينه
ما يدرون إن إحنه من فريج الحياج


مع تحيات
بوعمار الحايكي